نعتیہ استغاثہ بحضور سرور کونین صلی اللہ علیہ وسلم ۔ پرویز ساحر

حَبس بڑھنے لگا ' سانس گُھٹنے لگی ' یا نبیؐ ' یا نبیؐ !!

اب تو ہم پر ہو لُطف و عطا لِلّہی ' یا نبیؐ ' یا نبیؐ !!

چار سُو جیسے ظلمات کا دَور ہے ' کُفر کا زور ہے

ایسے میں ہیں فقَط آپ ہی روشنی ' یا نبیؐ ' یا نبیؐ !!

ہے پریشان خَلق ِ خدا آج کل ' کوئی اِس کا بھی حل

زندگی تلخ سے تلخ تر ہو گئی ' یا نبیؐ ' یا نبیؐ !!

اُمّتِ مُسلِمہ آج بیمار ہے ' خاصی لاچار ہے

کیجیے آپ ہی کوئی چارہ گَری ' یا نبیؐ ' یا نبیؐ !!

ہم ہیں راہِ ہِدایت سے بھٹکے ہُوئے ' خود سے اَٹکے ہُوئے

چاہیے ہے ہمیں آپ کی رہ بَری ' یا نبیؐ ' یا نبیؐ !!

کالی کملی میں اپنی چُھپا لیں ہمیں ' حوصلہ دیں ہمیں

ہم گُنہ گار ہیں آپ کے اُمّتی ' یا نبیؐ ' یا نبیؐ !!

ہم جو زندہ ہیں تَو آپ کا ہے کرم ' سیّد المحترَم !

آپ ہی کی بَہ دولت مِلی زندگی ' یا نبیؐ ' یا نبیؐ !!

آپ ہی سے ہے بَس لَو لگائی ہُوئی ' سب بنائی ہُوئی

آپ ہی تَو ہیں اِک شمّع اُمّید کی ' یا نبیؐ ' یا نبیؐ !!

کون ہے صاحِبِ ذی شعُور آپ سا ' دَہر میں دُوسرا

پھر عطا ہو ہمیں زات کی آگَہی ' یا نبیؐ ' یا نبیؐ !!

کب تلَک ہم رہیں آپ کے دَر سے دُور ' اِس طرح بے حضُور

اب تَو ہم کو مِلے مُژدہء حاضِری ' یا نبیؐ ' یا نبیؐ !!

میرے وِردِ زباں آپ کی نعت ہو ' آپ کی بات ہو

میرے ہونٹوں پہ جاری رہے ہر گھڑی ' یا نبیؐ ' یا نبیؐ !!

آپ کا ایک ادنٰی سا شاعِر ہُوں مَیں ' ایک ساحِرؔ ہُوں مَیں

ورنہ کیا شاعِری ۔۔ اَور کیا ساحِری ' یا نبیؐ ' یا نبیؐ !!

فہرست رہنمائی