کتاب "ربنا لک الحمد" ڈاکٹر محمد افتخار الحق ارقم صاحب کا شاندار ہدیہء حمد

اپنے ادارے کی نعتیہ سرگرمیاں، کتابوں کا تعارف اور دیگر خبریں بھیجنے کے لیے رابطہ کیجئے۔

تحریر: عتیق الرحمان صفی

ڈاکٹر محمد افتخار الحق ارقم کا شاندار ہدیہ ء حمد

سب تعریفیں اللہ تبارک و تعالٰی جل شانہُ کے لیے ہیں جو تمام مخلوقات کا پروردگار ہے. کائنات کی سب سے بڑی حقیقت اللہ تعالٰی کی ذات ہے جو سب جہانوں کا خالق و مالک ہے. اس کی اطاعت و بندگی میں ہی دنیا اور آخرت کی کامیابی کا راز پنہاں ہے. اس کی رحمتوں کا کوئی شمار نہیں. وہ رحمٰن و رحیم ہے. اس کی نعمتوں کی کوئی انتہا نہیں ہے. اللہ تعالٰی نے انسان کو اشرف المخلوقات بنایا پھر قلم کے ذریعے اسے وہ سب کچھ سکھایا جو وہ نہیں جانتا تھا. اس نے انسان کو عقل دی، علم دیا اور تخلیقی جوہر سے بھی نوازا. اسی تخلیقی جوہر کا ایک ماخذ شاعری ہے جو علم البیان میں اللہ تعالٰی کی خاص عطا ہے. کتنے خوش قسمت ہیں وہ لوگ جنھیں اللہ تعالٰی یہ خاص خوبی عطا کر کے اپنی تعریف کے لیے چن لیتا ہے. انھی خوش نصیب لوگوں میں سے ایک جناب ڈاکٹر محمد افتخار الحق ارقم بھی ہیں جنھوں نے قلم کے ذریعے اللہ تعالٰی کی حمد اور خاتم النبیین حضرت محمد صلی اللہ علیہ وسلم کی کی ثنا بیان کرنے کے لیے اپنی شاعری کے فن وقف کر رکھا ہے. ڈاکٹر محمد افتخار الحق ارقم صاحب بچپن سے لے کر جوانی تک اور جوانی سے لے کر آج تک صرف حمد اور نعت ہی لکھتے چلے آ رہے ہیں. ہر طرح کی شہرت اور دکھاوے سے بے نیاز ڈاکٹر محمد افتخار الحق ارقم صاحب نہ مشاعروں میں شریک ہوتے ہیں نہ ادبی محفلوں میں جاتے ہیں اور نہ ہی سوشل میڈیا استعمال کرتے ہیں بلکہ وہ ایک مدت سے گوشہ نشینی میں بہت عجز و نیاز کے ساتھ حمد و نعت پر مبنی اپنا تخلیقی سفر جاری رکھے ہوئے ہیں. ڈاکٹر افتخار صاحب ایک کہنہ مشق شاعر ہیں انھیں فن کی باریکیوں کا بخوبی علم ہونے کے ساتھ ساتھ ، اردو، عربی اور فارسی زبان پر کمال دسترس حاصل ہے اُن کا قرآن و حدیث کے علم کی روشنی میں کہا گیا حمدیہ اور نعتیہ کلام بار بر پڑھنے کے لائق ہے. ڈاکٹر محمد افتخار الحق ارقم صاحب کی حمد و نعت پر مبنی زیرِ طبع کتب کی تعداد سات ہے. انھیں کتب میں سے اُن کی حمدیہ کلام پر مشتمل پہلی کتاب حال ہی میںماورا پبلشرز لاہور سے " ربنا لک الحمد " کے نام سے شائع ہوئی ہے. ربنا لک الحمد ایک ایسا ہدیہء حمد ہے جو انھوں نے دل سے لکھا ہے. حمد کہنے کے لیے انھوں نے غزلیہ ہئیت کے ساتھ ساتھ مسدس، مخمس، مربع اور دیگر نظمیہ انداز کو بھی اختیار کیا ہے اور ہر انداز میں اللہ رب العزت کی شان میں بہترین نذرانہءحمد پیش کیا ہے. اُن کا حمدیہ کلام پڑھ کر ایمان تازہ ہو جاتا ہے اس لیے یہ کلام بار بار پڑھنے اور سننے کے لائق ہے

ڈاکٹر محمد افتخار الحق ارقم کا تعلق شہر گجرات کے ایک علمی و ادبی گھرانے سے ہے. وہ پیشے کے لحاظ سے ایم بی بی ایس ڈاکٹر ہیں اور انھوں نے شعبہ معطلی و بحالی ہوش و حواس ( Anesthesia ) میں اختصاص حاصل کر رکھا ہے. شاعری میں اللہ رب العزت کی حمد بیان کرنا اور نبی آخرالزمان حضرت محمد صلی اللہ علیہ وسلم کی نعت کہنا اُن کا خاص شوق ہے. ربنا لک الحمد اُن کے حمدیہ کلام پر مشتمل اُن کی پہلی کتاب ہے.

ڈاکٹر محمد افتخار الحق ارقم حمد کو اُم الاصناف کہتے ہیں.وہ کتاب " ربنا لک الحمد" کے پیش لفظ میں لکھتے ہیں کہ " اللہ کا لاکھ لاکھ شکر ہے کہ میں اپنا حمدیہ مجموعہ " ربنا لک الحمد " قارئین کی خدمت میں پیش کر رہا ہوں. میرے لیے یہ باعثِ سعادت و افتخار ہے اور یہ اعزاز میرے لیے ایک نعمتِ غیر مترقبہ ہے. میں اسے اللہ تعالٰی کی خاص مہربانی اور انتہائے بخشائش سمجھتا ہوں کہ اُس نے اپنے ایک حقیر بندے کو اپنی ثنا خوانی کے شرف سے ہمکنار کیا" -

ربنا لک الحمد کے دیباچے ممتاز شعراء کرام سعود عثمانی اور پروفیسر تفاخر محمود گوندل نے تحریر کیے ہیں جب کہ فلیپ جخالد شریف اورسعید الظفر صدیقی نے لکھے ہیں.

کتاب " ربنا لک الحمد " کے پہلے دیباچے میں جنابسعود عثمانی لکھتے ہیں کہ "ڈاکٹر محمد افتخار الحق ارقم صاحب قابلِ رشک ہیں کہ انھوں نے شاعری کا آغاز دورِ طالب علمی سے حمد و نعت سے کیا اور آج تک اسی راہ پر گامزن ہیں. "ربنا لک الحمد" پڑھتے ہوئے مجھے یہ احساس رہا کہ ڈاکٹر افتخار ارقم صاحب نے شاعری کے معیارات کو ملحوظ رکھا ہے، ڈاکٹر افتخار ارقم صاحب اچھے شاعر بھی ہیں اور صاحبِ علم بھی. یہ دونوں مل کر بعض اوقات اس توفیق کی طرف نہیں لاتے جس کا نام حمد ہے. یہ توفیق جسے ملے اُسے شکر ادا کرنا چاہیے. میں بھی اپنے لیے اس توفیق کی دعا کرتا ہوں اور ڈاکٹر صاحب کو پیغمبری سنت کے اس سنگم تک پہنچنے کی مبارک پیش کرتا ہوں " -

کتاب کے دوسرے دیباچے " ڈاکٹر افتخار کا اثاثہء تفاخر" میں پروفیسرتفاخر محمود گوندل صاحب رقمطراز ہیں کہ " ڈاکٹر محمد افتخار الحق ارقم صاحب نے نے مجرد حمدِ ربِ جلیل پر مشتمل ایک کتاب ربنا لک الحمد تخلیق کر کے ایک منفرد اعزاز حاصل کیا ہے، ڈاکٹر افتخار ارقم صاحب نے اس محدود خوابیدہ روایت کی جو عظیم الشان آبیاری کی ہے اُس کی داد میرے امکان میں نہیں. میری دانست میں یہ توفیقِ ایزدی کے بغیر ممکن نہیں. مبداء فیاض جن دلوں کو اس انعام کے لیے چن لیتا ہے وہی اس سعادت سے بہرہ یاب ہوتے ہیں. ڈاکٹر محمد افتخار الحق ارقم صاحب نے "ربنا لک الحمد" لکھ کر ایک تقدس آمیز روحانی فریضہ انجام دیا ہے جو تشنگانِ معرفت کو اس قدر غریقِ وحدت کر دیتا ہے کہ وہ ثنائے کبریا پڑھ کر سرشار و مست و بے خود و مسحور ہو جاتے ہیں. مجھے پوری اُمید ہے کہ جب تمازتِ آفتاب محشر میں ڈاکٹر ارقم صاحب اپنا یہ اچھوتا نذرانہء وجدان لے کر خالق و مالکِ کائنات کے حضور پیش ہوں گے تو سحابِ کرم اُن پر ضرور سایہ فگن ہو گا" –

کتاب کے پہلے فلیپ میں جنابخالد شریف صاحب لکھتے ہیں کہ" ڈاکٹر محمد افتخار الحق ارقم صاحب شاعری کے جملہ اسرارِ رموز اور نزاکتوں سے باخبر ہیں اور خصوصاً حمد کہنے کے لیے جس احتیاط اور جتنے ادب و آداب کی ضرورت ہوتی ہے، انھوں نے اسے بخوبی ملحوظِ حاطر رکھا ہے. فنی لحاظ سے بھی ڈاکٹر صاحب کا کلام پختہ ہے چنانچہ انھوں نے اس مشکل صنفِ سخن میں بھی اپنی قادر الکلامی کو برقرار رکھا ہے جو دراصل تو اُس قادرِ مطلق کی کرم نوازی کے بغیر ممکن نہیں ہوتا "-

کتاب "ربنا لک الحمد" کے دوسرے فلیپ میں جنابسعید الظفر صدیقی صاحب کا کہنا ہے کہ" محترم ڈاکٹر محمد افتخار الحق ارقم صاحب ہمارے درمیان ایک سخن فہم، سینئر کہنہ مشق اور قادر الکلام شاعر کے مقام پر تو ہیں ہی اللہ تعالٰی نے انھیں اپنی تائیدِ خاص سے عوام الناس کے درمیان اپنی حمد و ثنا بیان کرنے کی توفیق سے بھی خصوصی طور پر نوازا ہے. اس ضمن میں ان کا یہ حمدیہ شعری مجموعہ "ربنا لک الحمد" آج ہمارے سامنے ہے اس کے لیے ڈاکٹر صاحب از حد داد و تحسین و مبارکباد کے مستحق ہیں " -

ڈاکٹر محمد افتخار الحق ارقم صاحب کی نعت کی پہلی کتاب بھی "مدحِ محمود" کے خوبصورت نام سے اشاعت کے مراحل میں ہے. جو عنقریب قارئین کی خدمت میں پیش کر دی جائے گی. میں ڈاکٹر محمد افتخار الحق ارقم صاحب کو " ربنا لک الحمد" کی اشاعت پر دلی مبارکباد پیش کرتا ہوں اور دعاگو ہوں کہ اللہ تعالٰی انھیں اس نیک کام پر اجرِ عظیم عطا فرمائے آمین

عتیق الرحمٰن صفی. گجرات ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مزید دیکھیے

اپنے ادارے کی نعتیہ سرگرمیاں، کتابوں کا تعارف اور دیگر خبریں بھیجنے کے لیے رابطہ کیجئے۔

اس سال کی کچھ اہم کتابیں

اس سیکشن میں اپنے کتابیں متعارف کروانے کے لیے "نعت کائنات" کو دو کاپیاں بھیجیں اردو کا حمدیہ ادب: اجمالی جائزہ نعتیہ ادب ۔ مسائل و مباحث ۔ ڈاکٹر ابرار عبدالسلام انٹرنیشنل نعت مرکز کے پلیٹ فارم سے جناب حسن عسکری کاظمی کا مجموعہ ء نعت نور الحسن نور کا تیسرا مجموعہ کلام جو بھارت سے اردو اور دیوناگری رسم الخط میں شائع ہوا ڈاکٹر ذکیہ بلگرامی کا دوسرا مجموعہ نعت شائع ہوگیا ہے ۔ دبستان نعت کا دوسرا شمارہ ڈاکٹر سراج احمد قادری جیسے معتبر نعت شناس کی زیر ادارت شائع ہوا ہے ریاض حسین چودھری کی وفات کے بعد چھپنے والا حمدیہ مجموعہ ریاض حسین چودھری کی وفات کے بعد چھپنے والا نعتیہ مجموعہ

"نعت کائنات " پر اپنے تعارفی صفحے ، شاعری، کتابیں اور رسالے آن لائن کروانے کے لیے رابطہ کریں ۔ سہیل شہزاد : 03327866659

نئے صفحات
سرور حسین نقشبندی تقدیس قلم مناقب حضرت عثمان غنی کلیات صبیح رحمانی عبد الغنی تائب زبیب مسعود ڈاکٹر جوہر قدوسی سلیم شہزاد کی تقدیسی شاعری "کشفیہ" پر تبصرہ