سر جھکا کر کھجور کے پودے ۔ شاہد اشرف

شاعر: شاہد اشرف

نعتِ رسولِ آخر صلی اللہ علیہ وآلہ وسلم

سر جھکا کر کھجور کے پودے

چاپ سنتے تھے سب کھڑے پودے

جب گزرتے تھے آپِﷺ مکے سے

جھومتے تھے ہرے بھرے پودے

آپﷺ مکے سے کر گئے ہجرت

دور تک دیکھتے رہے پودے

جس سے کونپل نہ پھوٹتی تھی کبھی

اس زمیں سے اگے گھنے پودے

ہوئی تعمیر مسجدِ نبویﷺ

اپنے کٹنے پہ خوش ہوئے پودے

شاخ در شاخ پھیلتے جائیں

سبز گنبد کو دیکھ کے پودے

آپﷺ کے عہد میں ہوئے محفوظ

شاخِ گل ، پات ، گھونسلے ، پودے

میں فقط ایک بیج ہوں آقا ﷺ

کھولیے مجھ میں سب چھپے پودے

جب میں شاہد کھجور کھاؤں تو

یاد آئیں حجاز کے پودے

مزید دیکھیے

نعت ورثہ میں "2017 کی بہترین نعت" کی تلاش میں پیش کیے گئے کچھ عمدہ کلام
نگار خانہ ء صد رنگ تھا سخن اسکا ۔ حماد نیازی جاں کی دیوار گرا دے تو مزہ آجائے ۔ جاوید صدیقی لکھ سکا کب وصف کوئی سید کائنات کا ۔ غلام مجتبی ہاشمی	آپ تو جانتے ہیں مرے کرب کو ۔ سعود عثمانی ہوئی قبول میری ہر دعا مدینے میں ۔ صغیر احمد صغیر سر جھکا کر کھجور کے پودے ۔ شاہد اشرف

• اس انتخاب کا حصہ بننے کے لیے اپنی نعتیں "نعت ورثہ لٹریری ڈسکشن فورم " میں بھیجیں