ہے دل میں جلوہ تابان مصطفی ۔ شکیل بدایونی
شاعر : شکیل بدایونی
نعتِ رسولِ آخر صلی اللہ علیہ وآلہ وسلم[ترمیم | ماخذ میں ترمیم کریں]
ہے دل میں جلوۂ رُخِ تابانِ مصطفےٰ ﷺ
قندیلِ کعبہ ہے تہِ دامانِ مصطفےٰ ﷺ
سمجھے نہ ہم خُدا کی قسم شانِ مصطفےٰ ﷺ
کھائی خُدا نے خود قسمِ جانِ مصطفےٰ ﷺ
بے خوف حشر میں ہیں غلامانِ مصطفےٰ ﷺ
دارالاماں ہے گوشۂ دامانِ مصطفےٰ ﷺ
باہر حدِ خیال سے ہے شانِ مصطفےٰ ﷺ
ہر عزّت و وقار ہے شایانِ مصطفےٰ ﷺ
خوبانِ بزمِ حُسن ہیں قُربانِ مصطفےٰ ﷺ
اللہ رے تابشِ رُخِ تابانِ مصطفےٰ ﷺ
نُصرت بدوش ہے عَلمِ شانِ مصطفےٰ ﷺ
فتحِ مُبیں ہے بہرِ غلامانِ مصطفےٰ ﷺ
پُرساں گناہ گار کا محشر میں کون تھا
حاصل ہوئی اماں تہِ دامانِ مصطفےٰ ﷺ
خود ہیں مقامِ حمد پہ صرفِ ثنائے حق
بالائے عرش ، حق ہے ثنا خوانِ مصطفےٰ ﷺ
رفعت حضورﷺ کی حدِ امکاں سے ہے بلند
ہے اوجِ عرش تا حدِ پایانِ مصطفےٰ ﷺ
ادراکِ معرفت نہ کما حقہ ہوا
جبریل گو تھے خاصۂ خاصانِ مصطفےٰ ﷺ
سیرت جہاں نواز ہے صورت خدا نُما
ہے خالقِ جمال ، ثنا خوانِ مصطفےٰ ﷺ
محفل نوائے نعت سے مدہوش ہے شکیل
ہے لب پہ نغمۂ لبِ حسّانِ مصطفےٰ ﷺ