ہے دل میں جلوہ تابان مصطفی ۔ شکیل بدایونی

شاعر : شکیل بدایونی

نعتِ رسولِ آخر صلی اللہ علیہ وآلہ وسلم

ہے دل میں جلوۂ رُخِ تابانِ مصطفےٰ ﷺ

قندیلِ کعبہ ہے تہِ دامانِ مصطفےٰ ﷺ

سمجھے نہ ہم خُدا کی قسم شانِ مصطفےٰ ﷺ

کھائی خُدا نے خود قسمِ جانِ مصطفےٰ ﷺ

بے خوف حشر میں ہیں غلامانِ مصطفےٰ ﷺ

دارالاماں ہے گوشۂ دامانِ مصطفےٰ ﷺ

باہر حدِ خیال سے ہے شانِ مصطفےٰ ﷺ

ہر عزّت و وقار ہے شایانِ مصطفےٰ ﷺ

خوبانِ بزمِ حُسن ہیں قُربانِ مصطفےٰ ﷺ اللہ رے تابشِ رُخِ تابانِ مصطفےٰ ﷺ

نُصرت بدوش ہے عَلمِ شانِ مصطفےٰ ﷺ

فتحِ مُبیں ہے بہرِ غلامانِ مصطفےٰ ﷺ

پُرساں گناہ گار کا محشر میں کون تھا

حاصل ہوئی اماں تہِ دامانِ مصطفےٰ ﷺ

خود ہیں مقامِ حمد پہ صرفِ ثنائے حق

بالائے عرش ، حق ہے ثنا خوانِ مصطفےٰ ﷺ

رفعت حضورﷺ کی حدِ امکاں سے ہے بلند

ہے اوجِ عرش تا حدِ پایانِ مصطفےٰ ﷺ

ادراکِ معرفت نہ کما حقہ ہوا

جبریل گو تھے خاصۂ خاصانِ مصطفےٰ ﷺ

سیرت جہاں نواز ہے صورت خدا نُما

ہے خالقِ جمال ، ثنا خوانِ مصطفےٰ ﷺ

محفل نوائے نعت سے مدہوش ہے شکیل

ہے لب پہ نغمۂ لبِ حسّانِ مصطفےٰ ﷺ

مزید دیکھیے

زیادہ پڑھے جانے والے کلام
اے سبز گنبد والے منظور دعا کرنا ۔ صابر صابری تو شاہ خوباں، تو جان جاناں، ہے چہرہ ام الکتاب تیرا ۔ صائم چشتی لم یات نظیرک فی نظر مثل تو نہ شد پیدا جانا ۔ احمد رضا بریلوی نہ کہیں سے دور ہیں منزلیں ۔ منور بدایونی طائف میں کربلا کے سفینے کی روشنی ۔ نجمہ شاہین کھوسہ نسیما ! جانب بطحا گزر کن . مولانا عبدالرحمن جامی	مصطفٰے جانِ رحمت پہ لاکھوں سلام۔ امام احمد رضا خان بریلوی حضور ایسا کوئی انتظام ہو جائے ۔ سید صبیح الدین صبیح رحمانی حدود طائر سدرہ حضور جانتے ہیں ۔ سرور حسین نقشبندی اس کرم کا کروں شکر کیسے ادا ۔ عبدالستار نیازی یا نبی نظر کرم فرمانا اے حسنین کے نانا ۔ اوصاف علی زمین و زماں تمہارے لیے۔ امام احمد رضا خان بریلوی