شور مہ نو سن کر تجھ تک میں دواں آیا

نعت رسول کریم صلی اللہ علیہ وآلہ وسلم

از امام احمد رضا خان بریلوی

شور مہِ نو سن کر تجھ تک میں دواں آیا

ساقی میں ترے صدقے مے دے رمضاں آیا

اس گل کے سوا ہر پھول با گوش گراں آیا

دیکھے ہی گی اے بلبل جب وقت فغاں آیا

جب بام تجلی پر وہ نیر جاں آیا

سر تھا جو گرا جھک کر دل تھا جو تپاں آیا

جنت کو حرم سمجھا آتے تو یہاں آیا

اب تک کے ہر اک کا منہ کہتا ہوں کہاں آیا

طیبہ کے سوا سب باغ پامال فنا ہوں گے

دیکھو گے چمن والو! جب عہد خزاں آیا

سر اور وہ سنگ در آنکھ اور وہ بزم نور

ظالم کو وطن کا دھیان آیا تو کہاں آیا

کچھ نعت کے طبقے کا عالم ہی نرالا ہے

سکتہ میں پڑی عقل چکر میں گماں آیا

جلتی تھی زمیں کیسی تھی دھوپ کڑی کیسی

لو وہ قد بے سایہ اب سایہ کناں آیا

طیبہ سے ہم آتے ہیں کہیے تو جناں والو

کیا دیکھ کے جیتا ہے جو واں سے یہاں آیا

لے طوق الم سے اب آزاد ہو اے قمری

چٹھی لےے بخشش کی وہ سرو رواں آیا

نامہ رسے رضا کے اب مٹ جاﺅ برے کامو

دیکھو مرے پلّہ پر وہ اچھے میاں آیا

بدکار رضا خوش ہو بد کام بھلے ہوں گے

وہ اچھے میاں پیارا اچھوں کا میاں آیا

حدائق بخشش

حدائق بخشش

پچھلا کلام

نہ آسمان کو یوں سر کشیدہ ہونا تھا

اگلا کلام

خراب حال کیا دل کو پُر ملال کیا