سمتِ کاشی سے چلا جانبِ متھرا بادل ۔ محسن کاکوروی

شاعر: محسن کاکوروی

نعت رسول اللہ صل اعلی علیہ و سلم

سمتِ کاشی سے چلا جانبِ متھرا بادل

برق کے کاندھے پہ لاتی ہے صبا گنگا جل

گلِ خوش رنگ رسولِ مدنی و عربی

زیبِ دامانِ ادب، طرہِ دستار ازل

نہ کوئی اس کا مشابہ ہے ہمسر نہ نظیر

نہ کوئی اس کا مماثل نہ مقابل نہ بدل

اوجِ رفعت کا قمر، نخلِ دو عالم کا ثمر

بحرِ وحدت کا گُہر، چشمہؔ کثرت کا کنول

مہرِ توحید کی ضُو، اوج شرف کا مہ نو

شمعِ ایجاد کی لُو، بزم رِسالت کا کنول

مرجع روح امیں، زیب دہِ عرشِ بریں

حامی دینِ متیں، ناسخ ادیان و مِلل

ہفت اقلیم ولایت میں شہِ عالی جاہ

چار اطرافِ ہدایت میں نبی مُرسل