انسانیت کو خلق حسن سے سجا دیا

شاعر:عمران گونڈوی

بشکریہ:عالم نظامی

نعتِ رسولِ آخر صلی اللہ علیہ وآلہ وسلم

انسانیت کو خلق حسن سے سجا دیا

آقا نے آکے سب کا مقدر جگا دیا

سو چو تو لازوال ہے کتنی وہ زندگی

تاحشر جس حیات کو اسوہ بنادیا

بدر و احد حنین ہو یا ہو حدیبیہ

آقا نے ہر مقام پہ درس وفا دیا

خلق حسن سے جیتیے دل اور دماغ کو

آقانے سارا کام یہ کرکے دکھا دیا

کرتے ہیں یاد آپ کو اس میں تو شک نہیں

شاہا پیام آپ کا لیکن بھلادیا

اصحابی کالنجوم کہا جو حضور نے

انسان کو زمیں سے فلک پر بٹھا دیا

یا سیدی کہا ہے عمر نے بلال کو

اسلام نے غلام کو کیا مرتبا دیا

حضرت اسامہ فوج کے جنرل ہوا کیے

تفریق رنگ و نسل کو یکسر مٹادیا

یوں تو سبھی صحابہ تھے حضرت پہ جاں نثار

صدیق نے رسول پہ سب کچھ لٹا دیا

جو خود بھی بے مثال ہے دانش جہان میں

اس رب نے بے مثال ہمیں مصطفی دیا