در نبی پہ پڑا رہوں گا، پڑے ہی رہنے سے کام ہو گا ۔ کیف ٹونکی

در نبی پہ پڑا رہوں گا، پڑے رہنے سے کام ہو گا

کبھی تو قسمت کھلے گی میری کبھی تو میر سلام ہو گا

خلاف معشوق کچھ ہوا ہے نہ کوئی عاشق سے کام ہو گا

خدا بھی ہو گا ادھر اے دل جدھر وہ عالی مقام ہوگا

کئے ہی جاوں گا عرض مطلب ملے گا جب تک نہ دل کا مطلب

نہ شام مطلب کی صبح ہو گی نہ یہ فسانہ تمام ہو گا

جو دل سے ہے مائل پیمبر، یہ اس کی پہچان ہے مقرر

کہ ہر دم اس بے نوا کے لب پر درود ہوگا سلام ہوگا

اسی توقع پہ جی رہا ہوں یہی تمنا جلا رہی ہے

نگاہ لطف و کرم نہ ہوگی، تو مجھ کو جینا حرام ہوگا

ہوئی جو کوثر پہ باریابی تو کیف کی تیرے دھج یہ ہوگی

بغل میں مینا، نظر میں ساقی خوشی سے ہاتھوں میں جام ہوگا

فہرست رہنمائی