ثنا نژاد

ْْْْ

جنیدنسیم سیٹھی کامجموعہ نعت جو 2021میں شائع ہوا

ثنا نژاد سے انتخاب ۔ اسلام الدین اسلام

ذکر ِ رسول ِ پاک ہے تب سے انیسِ جاں

روشن ہوا ہے جب سے دریچہ شعور کا

۔۔۔۔۔۔

ہے جس پر منحصر تب و تابِ سخن وری

وہ صرف شاہ کون و مکاں کا قصیدہ ہے

۔۔۔۔۔۔

ذکرِ احمد سے ہوئے جب فکر و فن آراستہ

خود بخود ہوتا گیا طرزِ سخن آراستہ

طلعتِ رخ سے ہوا پیراستہ ایک ایک رنگ

پر توِ رخ سے ہوئی اک اک کرن آراستہ

چارسُو کِھلتے چلے جاتے ہیں مدحت کے کنول

ہے بہار نعت سے میرا وطن آراستہ

۔۔۔۔۔۔

فکر نے جب بھی طہارت کی شہادت نہیں دی

نعت کہنے کی مجھےدل نے اجازت نہیں دی

افضلیت بھی تیری چاہ سے مشروط ہوئی

تیرے منکر کو کبھی حق نے فضیلت نہیں دی

تیرے ذاکر کو بھی بخشا ہے مقامِ ارفع

اک ترے ذکرِ مطہرہی کو رفعت نہیں دی

جی بھر آیا جو کبھی گردشِ دوراں کے سبب

جُز درود اور کسی چیز نے راحت نہیں دی

۔۔۔۔۔۔

تمجید نے خود کی ہے ہر اک حرف کی تزئیں

تحمید کی رکھتا ہے سند ،نامِ محمدﷺ

۔۔۔۔۔۔

جب پڑھا نام ِمحمد پر درود

ایک نوری در مرے اندر کھلا

ناخنِ الطافِ حضرت کے طفیل

مجھ پہ ہر اک عقدۂ بے سر کھلا

ہادئ کون و مکاں کے فیض سے

رازِ ہستی نوعِ انساں پر کھلا

۔۔۔۔۔۔

اجابت آئی ہے خود چل کے خیر مقدم کو

مری دعا جو چلی اوڑھ کر ردائے درود

رواں دواں رہے دھڑکن میں بھی ہر اک لمحہ

یہی نہیں کہ زباں پر ہی صرف آئے درود

ثنا نژاد پرندوں نے بال و پر کھولے

ملی گلوں کو ہرے رنگ کی قبائے درود

۔۔۔۔۔۔

خیر کے داعی، اہلِ محبت، سب کے سب ہیں حاملِ نعمت

آپ کی آل سے آپ کے جد تک صلی اللہ علیہ وسلم

۔۔۔۔۔۔

خدا نے اس کو بنایا ہے رحمت عالم

نہیں ہیں اُس کے کرم کی کوئی حدود و قیود

۔۔۔۔۔۔

سواد ِجاں میں خراماں غبارِ کوئے نبی

زمینِ دل پہ سجی کہکشانِ رحمت ہے

عدوئے جاں کے لیے بھی دعا کا ہے انعام

زبان ِسرور ِعالم زبان ِرحمت ہے

۔۔۔۔۔۔

سر پر بشر کے تاج سجا افتخار کا

ملبوس مل گیا ہمیں عزو وقار کا

وہ گل ہے انتخاب ِنبوت کے باغ میں

نکھرا اِسی سے روپ ہے فصل ِبہار کا

۔۔۔۔۔۔

ان کے دربار میں آتی ہے تیقن پہ بہار

وہم ہو جاتا ہے خود نذرِخزاں ان کے حضور

۔۔۔۔۔۔

دیوانگی ہے اس درِعالی پہ ہوش مند

نے لب پہ ہاؤ ہُو ، نہ گریباں دریدہ ہے

۔۔۔۔۔۔

کوئی تاریخ میں آئے گا نہ تجھ جیسا امیں

تیرے اعدا بھی امانت میں تھے قائل تیرے

۔۔۔۔۔۔

بے علم زمانے پر تعلیم کے در کھولے

سرکار نے اسرارِ بہبود بشر کھولے

جتنے بھی زمانے ہیں کُن ہی سے سفر میں ہیں

آپ آئے زمانوں نے اسبابِ سفر کھولے

قبل آپ کی بعثت سے ظلمت کا یہ عالم تھا

روتی تھی سحر تیرہ آفاق میں سر کھولے

ہستی پہ نکھار آیا یوں آپ کی آمد سے

جس طرح نسیم آئے اور غنچۂ تر کھولے

دیکھے بھی تو کیا دیکھے گنبد کی طرف زائر

اشکوں کی اجازت ہو تو دیدۂ تر کھولے

۔۔۔۔۔۔

ام الکتاب آپ کے اوصاف کا بیاں

طہٰ مرے حضور ہیں یٰس مرے حضور

منشور دیں ہے آپ کی تعلیم دہر میں

دستورِ خیر آپ کا آئیں مرے حضور !

محتاج ِالتفات ہے امت کا حالِ زار

دنیا رہی ہے ہاتھ میں نَےدیں مرے حضور!

۔۔۔۔۔۔

آدمی پر زندگی کا راز افشا کر دیا

آدمی کو آدمیت سے شناسا کر دیا

آئنہ انسان کے دل کا مصفٰی کر دیا

فیض نے تیرے شہِ کونین ! کیا کیا کردیا

۔۔۔۔۔۔

مدت سے بھٹکتے ہوئے انسان نے آقا !

پایا ہے ہدایت کا چلن آپ کے صدقے

۔۔۔۔۔۔

ترے پیام سے لرزاں ہےمحفلِ الحاد

ترے کلام سے اصنام پارا پارا ہیں

تو وہ مبلغ ِحق جس کو بہرِ دینِ متیں

اذیتیں بھی سبھی طرح کی گوارا ہیں ہیں

۔۔۔۔۔۔

بھٹکتے رہنا تھا الحاد کے اندھیروں میں

نبی کی راہنمائی سے حق رسا ہوئے ہم

۔۔۔۔۔۔

گزرے ہوئے لمحوں کا نشاں تیری عنایت

آتی ہوئی صدیوں کی خبر تیری عطا ہے

۔۔۔۔۔۔

ربط ہے ان کو یادِ طیبہ سے

یاد آئی تو آگئے آنسو

ان کے قرباں کہ لطف فرمایا

ان کے صدقے جو آگئے آنسو

۔۔۔۔۔۔

ختم قصہ ہوا اذہان کی عریانی کا

ایسی خوش پوشئ افکار مدینے سے چلی

زندگی خاک بسر شہر ِکرم تک پہنچی

ہو کے پھر صاحبِ دستار مدینے سے چلی

کا سۂ شب کو مدینے سے ملا ماہ ِتمام بھی

صبح بھی ہو کے ضیا بار مدینے سے چلی

۔۔۔۔۔۔

تو خلقت میں ہے گر اول تو بعثت میں مؤخر ہے

ابد تک ہے رسالت تیری قائم مرسلِ خاتم !

۔۔۔۔۔۔

کسی شمار میں کب ہے گدائے دل بستہ

شرف بس اتنا کہ دربار سے ہے پیوستہ

اس ایک لمحے میں کتنی کُشادِ خاطر ہے

جو تیرے تذکرۂ نور سے ہو وابستہ

کھلا ہے ہم پہ تری سیرت ِمجلٰی سے

حیات و موت کا ایک ایک رازِ سر بستہ

درود پڑھتا ہوں اور پھول چنتا رہتا ہوں

سجا کے قریۂ جاں میں رکھا ہے گل دستہ

ترا کرم میرا ہر ایک مصرعِ موزوں

تری عطا مرا ہر ایک شعرِ برجستہ

حضور! رزقِ سخن کی اسے بھی بھیک ملے

حضور! در پہ کھڑا ہے جنیدِ لب بستہ

۔۔۔۔۔۔

شاید اس بار حضوری کی اجازت مل جائے

اسی امید پر اس بار بھی ساماں باندھا

ایک بھی شعر تری نعت کے لائق نہ ہوا

ایک مضموں نہ تری شان کے شایاں باندھا

۔۔۔۔۔۔

عطا وہ رنگ ِسخن کر جو ہو تجھے منظور

زباں کو بخش وہ طرزِ ہنر جو تو چاہے

۔۔۔۔۔۔

وہ نیند بھی دراصل حضوری کی کڑی ہے

جو نیند تجھے حسرت دیدار میں آوے

کس درجہ گراں قدر ہے رحمت کی نظر میں

وہ اشک کہ جو چشمِ گنہگار میں آوے

۔۔۔۔۔۔

سایۂ لطف مرے سر پہ بھی تانے رکھا

حبس سے دور مجھے تیری ثنا نے رکھا

خواب میں بھی تری مدحت کے مضامیں باندھے

جیسے جبریل کا پَر میں نے سرہانے رکھا

جب تصور میں تری شانِ شفاعت رکھی

خوفِ عقبےٰ سے مجھے دور خدا نے رکھا

چھوکے آئی تری دہلیز کو جب آخرِ شب

صبح تک شاد مجھے بادِ صبا نے رکھا

۔۔۔۔۔۔

فضل خدا ہوا کہ فترضٰی کا قول حق

ہم نے پڑھا نبی کی شفاعت کی ذیل میں

ذکرک کے باب میں یہ رفعنا کا سلسلہ

ہم اہلِ نعت ہیں اسی رفعت کی ذیل میں

۔۔۔۔۔۔

رنگ و نسب و نسل کی تفریق مٹا دی، توقیر بڑھا دی

اک صف میں کھڑے کر دیے سب ادنیٰ واعلٰی اے سید والا!

ہو بھیک عطا ناعتِ ذیشان کے صدقے، حسان کے صدقے

تا عمر تری نعت رہے میرا حوالا، اے سید والا!

۔۔۔۔۔۔

اللہ اللہ! وہ مدینے کی اذانوں کا سرور

جب ترے سامنے کانوں میں ترا نام آیا

۔۔۔۔۔۔

بے ادب ہوں نہ کہیں سلسلۂ تار ِ نظر

مژہ جنبش میں رہے بیش نہ کم دیدۂ نم!

دیکھ ! یہ اُستن ِ توبہ ہے ستادہ بہ ادب

ساتھ ہے حجرۂ سلطان امم ، دیدۂ نم!

دشتِ بطحا میں جنید آج نظر آیا مجھے

آہوئے درد سا کرتا ہوا رَم دیدۂ نم

۔۔۔۔۔۔

وقت اذاں وہاں پہ الجھتی تھیں دھڑکنیں

قابو میں دل نہ رہتا تھا اس ایک نام پر

اس آس پر کہ پھر سے بلائیں مجھے حضور

آنکھیں لگا کے رکھی ہیں باب السلام پر

منتخب :اسلام الدین اسلام