کرم آج بالا ۓ بام آگیا ہے

شاعر: خالد محمود خالد

بشکریہ: عالم نظامی

نعتِ رسولِ آخر صلی اللہ علیہ وآلہ وسلم

کرم آج بالائے بام آ گیا ہے

زباں پر محمد کا نام آ گیا ہے

درودوں کی بارش ہے کون و مکاں پر

کہ آج انبیاء کا امام آ گیا ہے

مجھے مل گئی ہے دو عالم کی شاہی

مرا ان کے منگتوں میں نام آ گیا ہے

مرے پاس کچھ بھی نہ تھا روزِ محشر

نبی کا وسیلہ ہی کام آ گیا ہے

مزا جب ہے سرکار محشر میں کہہ دیں

وہ دیکھو ہمارا غلام آ گیا ہے

چراغاں ہوا بزمِ ہستی میں خالدؔ

نگاہوں میں حسن تمام آ گیا ہے