کب بگڑی بناو گے، کب در پہ بلاو گے ۔ ریاض سہروردی

کب بگڑی بناو گے، کب در پہ بلاو گے

امید ہے عاصی کو سرکار نبھاو گے

سیراب کب کروگے کب یہ تشنہ جگر میرا

کب اپنی محبت کا اک جام پلاو گے

کب آئے گا وہ لمحہ، کب آئے گی وہ ساعت

اک بار کبھی آقا جب خواب میں آوگے

چھوٹا سا ہے منہ میرا، پر بات بڑی سی ہے

کیا آپ میرے دل کی بستی بھی بساو گے

اٹھ جائیں گے سب پردے دیدارِ خدا ہوگا

والیل کی زلفوں کو جب رخ سے ہٹاو گے

جس چہرہ انور پر رہتی نظر رب کی

کب ایک جھلک اس کی عاصی کو دکھاو گے

آو کہ سنیں نعتیں ہم رحمت عالم کی

احساس کرم ہوگا تسکین سی پاو گے

امید ہے مجھ جیسے عاصی کو سرِ محشر

دامن میں شفاعت کے سرکار چھپاو گے

پروانہ صفت اس پہ ہوجائے گا دل قربان

جب اس میں شمع اپنی الفت کی جلاو گے

ہو جائے گا صاف اپنا دامن یہ گناہوں سے

آنکھوں سے ندامت کے جب اشک بہاو گے

اے کاش ریاض آئے مژدہ یہ مدینے سے

سرکار بلاتے ہیں، تم نعت سناو گے

فہرست رہنمائی