چاندنی چاندنی گلستاں گلستاں اس قدم کے نشاں (سید ادیب رائے پوری)

چاندنی چاندنی ، گلستاں گلستاں، اُس قدم کے نشاں

روشنی روشنی، کہکشاں کہکشاں، اُس قدم کے نشاں

خار نازِ چمن، سنگ لعلِ یمن، خاک ہے سیم تن

مشک ہے پیرہن، پڑگئے ہیں جہاں، اُس قدم کے نشاں

وہ دلیلِ کرم، وہ نگارِ حرم، وہ جمالِ ارم

قبلۂ محترم، کعبۂ عاشقاں، اُس قدم کے نشاں

آبروئے زمیں، نازِ عرشِ بریں، وہ نگارِ حسیں

جھک رہی ہے جبیں، مل رہے ہیں جہاں، اُس قدم کے نشاں

عظمتِ انبیاء، عارف و اولیاء، سالک و صوفیا

غوث الاعظم ہیں اور خواجۂ خواجگاں، اُس قدم کے نشاں

نورِ چشم و بصر، نورِ شمس و قمر، نورِ شام و سحر

قصۂ مختصر، نورِ کون و مکاں، اُس قدم کے نشاں

آرزوئے ادیبؔ ، آبروئے ادیبؔ ، جستجوئے ادیبؔ

منتہائے طلب اور تمنائے جاں، اُس قدم کے نشاں​