نبی کے نام پہ ہو جا فنا بقا کے لیے

شاعر: راحت انجم

بشکریہ:عالم نظامی

نعتِ رسولِ آخر صلی اللہ علیہ وآلہ وسلم

نبی کے نام پہ ہو جا فنا بقا کے لیے

تمام عمر کر ان سے وفا خدا کے لیے

حضور کرتے ہیں سب پر نوازشیں اپنی

لبوں پہ "لا" نہیں لاتے کسی گدا کے لیے

قسم سے ہو گئی معراج میرے ہونٹوں کی

جو میں نے بوسے محمد ﷺ کے نقش پا کے لیے

خدارا تاب سخن کیجیے عطا مجھ کو

یہ التجا ہے شہا آپ کی ثنا کے لیے

براے اہل محبت ہے جنت الفردوس

ہے نار دشمن محبوب کبریا کے لیے

جو عشق احمد مختار میں ہوا بیمار

طبیب ڈھونڈنے نکلا وہ کب دوا کے لیے ؟

ہے جس کے قلب میں قندیل عشق شہ روشن

لحد میں ترسے وہ کیوں کر بھلا ضیا کے لیے

وہ کیسے لوگ ہیں راحت جو کچھ نہیں کرتے

بقاے عزت و ناموس مصطفیٰ ﷺ کے لیے