قدرت فن سے ہے ممکن نہ ہنر ہے مر ے دوست ۔ سید عرفی ہاشمی

شاعر : سید عرفی ہاشمی

نعتِ رسولِ آخر صلی اللہ علیہ وآلہ وسلم

قدرت_ فن سے ہے ممکن' نہ ہنر ہے مرے دوست

نعت کا ہونا تو آقا کی نظر ہے مرے دوست

آخری حد تونہیں آیت _ معراج _ رسول

یہ محبت میں ابھی پہلی خبر ہے مرے دوست

تیری خواہش تھی کبھی جھک کے فلک کو دیکھے

آ جا اب سامنے سرکار کا در ہے مرے دوست

ہاں وہی بات جو وجدان کا حصّہ بھی نہ تھی

ان کو اس بات کی پہلے سے خبر ہے مرے دوست

خاک جس نور کو چومے تو نبی بن جائے

تو سمجھتا ہے ترے جیسا بشر ہے مرے دوست

جب سے سرکار سے ملنے کا ملا ہے پیغام

تب سے یہ جسم فقط دیدہ_ تر ہے مرے دوست

پا ر سدرہ کے ادھر پہنچے ہیں نعلین_ حضور

اور جسے کہتے ہیں جبریل‘ ادھر ہے مرے دوست

طے مدینے کی مسافت ہو ضروری تو نہیں

یہ تو انسان کے اندر کا سفر ہے مرے دوست

جس کو آنا ہے مدینے وہ نجف سے آئے

علم کے شہر کا بس ایک ہی در ہے مرے دوست

وہ جو دوزخ کو بھی فردوس بنا سکتی ہے

صرف سرکار_ دوعالم کی نظر ہے مرے دوست

مزید دیکھیے

[{منتخب شاعری }}