عدو کے واسطے ہر ایک امتی کے لیے ۔ مقبول شارب

شاعر: مقبول شارب

نعتِ رسولِ آخر صلی اللہ علیہ وآلہ وسلم

عدو کے واسطے، ہر ایک امتی کے لیے

دعائیں کیں شہِ کونین نے سبھی کے لیے

میں پی رہا ہوں مسلسل شرابِ عشقِ رسول

یہ بے مثال ہے تسکین سرمدی کے لیے

مدام رشکِ گُل تر کا تذکرہ لب پر

سجائے رکھتا ہوں ایماں کی تازگی کے لیے

تم اپنے پاس رکھو ہر خوشی، جہاں والو

نبی کا غم ہے بہت میری زندگی کے لیے

ہوائے گلشن طیبہ کا ایک ہی جھونکا

بہت ہے غنچۂ دل کی شگفتگی کے لیے

کرم کی ایک جھلک اب تو اے مہِ طیبہ

ترس رہا ہے کوئی کب سے چاندنی کے لیے

سیاہ خانۂ دل میں جلا لیا شارب

چراغ ان کی محبت کا روشنی کے لیے