شاہد و غیب میں , موجود , رسولِ عربی ۔ارشاد نیازی

نعتِ رسولِ آخر صلی اللہ علیہ وآلہ وسلم

شاہد و غیب میں , موجود , رسولِ عربی

خود ہیں حامد کہیں محمود , رسولِ عربی

ِقربت ِحق بھی وہی حاصل ِہستی بھی وہی

ہوں اگر منزلِ مقصود , رسول عربی

جن کے انوار کی حد ارض و سما سے ہے ورا

جن کی وسعت نہیں محدود, رسولِ عربی

کھل گئے نظرِ عنایت سے مری ہستی پر

راستے قرنوں سے مسدود , رسولِ عربی

آپ چاہیں تو میسر مجھے ہو سکتی ہے

دید کی ساعتِ مسعود , رسولِ عربی

اسمِ سرکار کی خوشبو سے معطر ہو کر

ہر سخن میراِ بنے عود , رسولِ عربی

وجہِ تخلیقِ جہاں رحمتِ عالم , ارشاد

جن کا عاشق ہوا معبود , رسولِ عربی