سرورِ انبیا صلوۃ و سلام (سید مرغوب احمد اختؔر الحامدی)

سرورِ انبیا صلوۃ و سلام

مظہرِ کبریا صلوۃ و سلام

اے حبیبِ خدا صلوۃ و سلام

مجتبٰے مُصطفٰے صلوۃ و سلام

طاہر و باطن، اوّل و آخر

ابتدا انتہا صلوۃ و سلام

آگیا آگیا ربیع النّور

ماہِ نُور و ضیا صلوۃ و سلام

روزِ پیدائشِ حبیب آگیا

مرحبا مرحبا صلوۃ و سلام

آئی پڑھتی ہوئی دُرود بہار

گل نے کِھل کر کہا صلوۃ و سلام

جھوم اُٹھی شاخ شاخ گلشن میں

ہر طرف شور اُٹھا صلوۃ و سلام

پتے پتے کی ہے زباں پہ دُرود

باغ پڑھنے لگا صلوۃ و سلام

قدسیوں میں بھی دھوم دھام سی ہے

آرہی ہے صدا صلوۃ و سلام

عرش پر بھی جشنِ سالگرہ

بھیجتا ہے خدا صلوۃ و سلام

روزِ عیدِ منیر کا صدقہ

ہو مجھے بھی عطا صلوۃ و سلام

ہو میسر سکونِ روح مجھے

آپ پر دائما صلوۃ و سلام

میں بھی ہوں شاعرِ درِ والا

ہے وظیفہ مرا صلوۃ و سلام

پردہ حشر میں اختؔر کا رہ جائے

کملی والے شہا صلوۃ و سلام​