جگر مراد آبادی

نمونہ کلام

اک رند ہے اور مدحت سلطان مدینہﷺ

نعتِ رسولِ آخر صلی اللہ علیہ وآلہ وسلم

اک رند ہے اور مدحت سلطان مدینہﷺ

ہاں کوئی نظر رحمت سلطان مدینہﷺ

تو صبح ازل آئینہ حسن ازل بھی

اے صل علی صورت سلطان مدینہﷺ

اے خاک مدینہ تری گلیوں کے تصدق

تو خلد ہے تو جنت سلطان مدینہﷺ

ظاہر میں غریب الغربا پھر بھی یہ عالم

شاہوں سے سوا سطوط سلطان مدینہﷺ

اس طرح کہ ہر سانس ہو مصروف عبادت

دیکھوں میں در دولت سلطان مدینہﷺ

کونین کا غم، یاد خدا، درد شفاعت

دولت ہے یہی دولت سلطان مدینہﷺ

اس امت عاصی سے نہ منہ پھیر خدا یا

نازک ہے بہت غیرت سلطان مدینہﷺ

اے جان بلب آمدہ، ہشیار، خبردار

وہ سامنے ہیں حضرت سلطان مدینہﷺ

کچھ اور نہیں کام جگر مجھ کو کسی سے

کافی ہے بس اک نسبت سلطان مدینہﷺ

شراکتیں

صارف:تیمورصدیقی