ایسا کوئی محبوب نہ ہوگا، نہ کہیں ہے ۔ اعظم چشتی

ایسا کوئی محبوب نہ ہوگا، نہ کہیں ہے

بیٹھا ہے چٹائی پہ مگر عرش نشیں ہے

ملتا نہیں کیا کیا دو جہاں کو ترے در سے

اک لفظ نہیں ہے کہ ترے لب پہ نہیں ہے

ہیں تیرے ہوا خواہوں میں مراسل بھی، نبی بھی

کونین ترے زیرِ اثر، زیرِ نگیں ہے

تو چاہے تو ہر شب ہو مثالِ شبِ اسریٰ

تیرے لیے دو چار قدم عرشِ بریں ہے

ہر اک کو میسر کہاں اُس در کی غلامی

اُس در کا تو دربان بھی جبریل امیں ہے

رُکتے ہیں یہیں آ کے قدم اہلِ نظر کے

اس کوچے سے آگے نہ زماں ہے، نہ زمیں ہے

اے شاہِ زمن! اب تو زیارت کا شرف دے

بے چین ہیں آنکھیں مری، بے تاب جبیں ہے

دل گریہ کناں اور نظر سوئے مدینہ

اعظم ترا اندازِ طلب کتنا حسیں ہے

فہرست رہنمائی