اپنی بد حالی سے یہ کہتے بھی شرماتے ہیں ہم ۔ زکی کیفی

شاعر: زکی کیفی

نعتِ رسولِ آخر صلی اللہ علیہ وآلہ وسلم

اپنی بد حالی سے یہ کہتے بھی شرماتے ہیں ہم

جا پڑیں قدموں پہ ان کے جن کے کہلاتے ہیں ہم

آپ کا جب ذکر چھڑتا ہے کسی عنوان سے

گوش بر آواز بزم دو جہاں پاتے ہیں ہم

جیسے صحرا میں بگولہ جیسے دریا میں حباب

سوئے طیبہ اس طرح سے جھومتے جاتے ہیں ہم

آپ کے در کے گدائے بے نوا بن کر رہیں

یہ ملے دولت تو ہر دولت کو ٹھکراتے ہیں ہم

کوئی عالم ہو انھیں کا نام ہے ورد زباں

ایک نغمہ ہے جسے ہر ساز پہ گاتے ہیں ہم

زندگی کی ہر کٹھن منزل میں جب بھی دیکھئے

آپ کے نقش قدم کو راہنما پاتے ہیں ہم

شراکتیں

امینہ عمر