آیہِ حسنِ بے مثال لاکھوں سلام آپ پر (سید مرغوب احمد اختؔر الحامدی)
شاعر: سید مرغوب احمد اختر الحامدی
نعتِ رسولِ آخر صلی اللہ علیہ وآلہ وسلم[ترمیم | ماخذ میں ترمیم کریں]
آیہِ حُسنِ بے مثال ، لاکھوں سلام آپ پر
سایہِ عینِ ذوالجلال ، لاکھوں سلام آپ پر
اے مدنی مہِ کمال ، لاکھوں سلام آپ پر
مہرِ منیرِ لازوال ، لاکھوں سلام آپ پر
ماہِ جبینِ ضحیٰ مثال ، لاکھوں سلام آپ پر
لوحِ صحیفہِ جمال ، لاکھوں سلام آپ پر
حضرتِ مُطّلب کے لال ، لاکھوں سلام آپ پر
آمنہ بی کے نونہال ، لاکھوں سلام آپ پر
معنیِ آیہِ جمال ، لاکھوں سلام آپ پر
شرحِ صفاتِ لایزال ، لاکھوں سلام آپ پر
حُسنِ ہمہ، ہمہ جمال ، لاکھوں سلام آپ پر
چاند جبیں، بھنویں ہلال ، لاکھوں سلام آپ پر
نُور ہی نُور بال بال ، لاکھوں سلام آپ پر
حُسن ہی حُسن خدو خال ، لاکھوں سلام آپ پر
آپ کی ذات بیمثال ، لاکھوں سلام آپ پر
آپ کا دائرہ محال ، لاکھوں سلام آپ پر
رب ہے مُحِبِّ بے مثال ، لاکھوں سلام آپ پر
آپ حبیبِ خوش خصال ، لاکھوں سلام آپ پر
کتنا حَسین و تابناک صَلِّ علٰی ہے نامِ پاک
میمِ مبیں سے تا بہ دال ، لاکھوں سلام آپ پر
آپ خدا کے ہیں حبیب آپ خدا سے ہیں قریب
آپ کا مثل ہے محال ، لاکھوں سلام آپ پر
آپ ہیں میری کائنات آپ کا غم مری حیات
آپ کا ہجر ہے وصال ، لاکھوں سلام آپ پر
فرش سے تادنٰی گئے آن میں آپ آگئے
کتنی سبک ہے چال ڈھال ، لاکھوں سلام آپ پر
حاضرِ در ہے شاہِ دیں آپ کا اختؔرِ حزیں
کشتہِ غم شکستہ حال ، لاکھوں سلام آپ پر
مزید دیکھیے[ترمیم | ماخذ میں ترمیم کریں]
حفیظ تائب | مظفر وارثی | اعظم چشتی | احمد ندیم قاسمی | محسن کاکوروی | مولانا حسن رضا بریلوی | مولانا الطاف حسین حالی | امیر مینائی