آقاؐ تری رحمت کی گھٹا سب کے لیے ہے - زینب سروری
نعت کائنات سے
نظرثانی بتاریخ 08:23، 17 نومبر 2019ء از 83.110.249.192 (تبادلۂ خیال) (←نعت رسول کریم صلی اللہ علیہ وسلم)
نعت رسول کریم صلی اللہ علیہ وسلم
آقا تری رحمت کی گھٹا سب کے لئے ہے
یہ فیض یہ بخشش یہ عطا سب کے لئے ہے
ہیں ارض سما نور سے سرکار کے روشن
اس نیّرِ تاباں کی ضیا سب کے لئے ہے
بےخوف چلیں گے تری رحمت کے سہارے
بازار شفاعت کا کھلا سب کے لئے ہے
منظر ترے روضے کا دل آویز بہت ہے
انوار سے لبریز فضا سب کے لئے ہے
یزداں نے بنایا ہے تجھے رحمتِ عالمﷺ
اک تیرا نگر دارِ بقا سب کے لئے ہے
مخمورفضا میں جوصبا گھول رہی ہے
گیسو کی مہک تیری شہا سب کے لئے ہے
بس ایک نظر ہے ترے بیمار کو کافی
اے کنزِ کرم دستِ دعا سب کے لئے ہے
موقوف نہیں مومن و کافر پہ ذرا بھی
سرور تری چاہت کا صلہ سب کے لئے ہے
خوش بخت ہی آتےہیں زیارت کو ترے در
دربار فضیلت کا کھلا سب کے لئے ہے
دہلیز پہ بیٹھی ہوئی زینب کو خبر ہے
زاہد ہو کہ عاصی ہو دعا سب کے لئے ہے