یہ آل محمد سے ہم کو جو محبت ہے

شاعر: حسن فتح پوری

بشکریہ:عالم نظامی

نعتِ رسولِ آخر صلی اللہ علیہ وآلہ وسلم

یہ  آل  محمد  سے  ہم  کو  جو  محبت  ہے

ہم سب پہ یہ واجب ہے، یہ اجر رسالت ہے

مومن کے لئے تو یہ بخشش کی ضمانت ہے

ہاں  ذکرِ  محمد  میں   اللہ   کی  رحمت   ہے

جب نعت نبی کہئے، زمزم سے وضو کیجے

اس نعت محمد  کے ہر لفظ  کی حرمت ہے

اللہ   کا   سجدہ   ہو    یا   ذکرِ    محمد   ہو

یہ بھی تو عبادت ہے وہ بھی تو عبادت ہے

پیغام  رسالت   سے  روشن  ہے   مرا   سینا

اس بندہء خاکی پر اس رب کی عنایت ہے

اس  وقت  زمانے  کے  حالات  یہ کہتے  ہیں

کردار    محمد  کی   دنیا   کو   ضرورت   ہے

اک   روز    مدینے   میں   سرکار    بلائیں   گے

مدت سے حسن میرے دل میں یہی حاجت ہے