آنکھ تو وہ ہے جسے شہرِ مدینہ بھائے

شاعر: اقبال اشہر

بشکریہ:عالم نظامی

نعتِ رسولِ آخر صلی اللہ علیہ وآلہ وسلم

آنکھ تو وہ ہے جسے شہرِ مدینہ بھائے

سر تو وہ ہے کہ جو سجدے سے نہ اٹھنے پائے

پیاس تو وہ ہے تمنّا ہو جسے کوثر کی

شوق تو وہ ہے جو طیبہ کی طرف لے جائے

درد تو وہ ہے کہ ہو یادِ نبی جس کا علاج

اشک تو وہ ہے کہ جو حرفِ دعا بن جائے

نیند تو وہ ہے حسد جس سے کرے بیداری

خواب تو وہ ہے نظر جس میں مدینہ آئے

پھول تو وہ ہے کہ جو روضۂ اطہر پہ کھلے

سنگ تو وہ ہے جو اُس کوچے میں ٹھوکر کھائے

ظرف تو وہ ہے رعونت سے نہ ہو جو واقف

شاہ تو وہ ہے جو اُس در کا گدا کہلائے