ہے خدا وندی کرم نامِ نبی (واحد نظیرؔ )

شاعر: پروفیسر ڈاکٹر واحد نظیر ؔ(نئی دہلی)

ﷺ

ہے خدا وندی کرم نامِ نبی

دور کر دیتا ہے غم نامِ نبی

ہم فقیروں کی ہے سلطانی عجب

تاج و دستار و درم نامِ نبی

وردِ جاں، وردِ نفس، وردِ نگہ

وردِ قرطاس و قلم نامِ نبی

نام سارے انبیاء کے محترم

محترم سے محترم نامِ نبی

جب سے آنکھیں با سلیقہ ہو گئیں

لکھ رہی ہیں یم بہ یم نامِ نبی

ہو گئی روشن بصیرت کی نگاہ

اہلِ دل کا جامِ جم نامِ نبی

صدقے جاؤں اے نفس کے زیر و بم

سُن رہا ہوں دم بہ دم نام ِ نبی

عمر بھر کرتے رہے کاغذ سیاہ

حاصلِ لوح و قلم نامِ نبی

زیبِ جاں کیجئے نظیرؔ اس نام کو

ہے غریوبوں کا بھرم نامِ نبی

"نعت کائنات"پر غیر مسلم شعراء کی شاعری کے لیے بھی صفحات تشکیل دیے گئے ہیں ۔ ملاحظہ فرمائیں : غیر مسلم شعراء کی نعت گوئی