ظُہورِ فخرِ مشیّت لبِ رسولِ کریمﷺ ۔ مقصود احمد تبسم

نعتِ رسولِ آخر صلی اللہ علیہ وآلہ وسلم

ظُہورِ فخرِ مشیّت لبِ رسولِ کریمﷺ

حسیں کرشمۂ قدرت لبِ رسولِ کریمﷺ

زبان ذاکرِ حُسنِ تلاوتِ توحید

ہیں رِحلِ مُصحفِ مدحت لبِ رسولِ کریمﷺ

جمالِ لعلِ بدخشاں میں اپنے رنگ کہاں

جہانِ قاسمِ رنگت لبِ رسولِ کریمﷺ

اگر حُضور کے دندان موتیوں سے حسیں

صدف کا حُسنِ رعایت لبِ رسولِ کریمﷺ

نزولِ آیۂ مَا يَنطِقُ ہے شان اِن کی

ہیں ترجمانِ حقیقت لبِ رسولِ کریمﷺ

خدا کو اِس لئے ہم مانتے ہیں دیکھے بغیر

سنائیں متنِ ہویّت لبِ رسولِ کریمﷺ

لبوں سے چھُو کے دعا مُستجاب ہو جاتی

ہیں استعارۂ قدرت لبِ رسولِ کریمﷺ

عُمرؓ نے چوما تھا یہ کہہ کے سنگِ اسود کو

بڑھا گئے تری عظمت لبِ رسولِ کریمﷺ

حُروف اُنﷺکے لبوں سے دوام پاتے تھے

بِنائے معنی و نُدرت لبِ رسولِ کریمﷺ