تو اوج رسالت ہے، شہ خیر امم ہے ۔ آفتاب نقوی

شاعر: آفتاب نقوی

نعتِ رسولِ آخر صلی اللہ علیہ وآلہ وسلم

تو اوجِ رسالت ہے، شہِ خیر امم ہے

تو وہ ہے کہ زیبا جسے ہر جاہ وحشم ہے

خالق نے بنایا تجھے ہر چیز کا مولا

کونین کی ہر شے تری ممنون کرم ہے

ادراک میں کس طرح سمائے تری عظمت

ہر رفعتِ افلاک ترا نقشِ قدم ہے

گونجے ہیں زمانے میں تیرا اسمِ گرامی

قائم ہے تو اس نام سے کچھ اپنا بھرم ہے

آنے سے تیرے دور ہوئے ظلم کے سائے

تو عدل کا انصاف کا لہراتا علم ہے

خالق نے سکھایا مجھے مدحت کا سلیقہ

محبوبِ دو عالم کی عطا میرا قلم ہے

زندہ ہے جو اس عہد پَر آشوب میں نقوی

یہ تیری دعا ہے، تری نظر، تیرا کرم ہے