مرے مولا کہتا رہوں سدا تری شان جل جلالہ ۔ سجاد بخاری

شاعر: سجاد بخاری

{{حمد ]]

مرے مولا کہتا رہوں سدا , تری شان جل جلالہ

مجھے کر عطا یہی سلسلہ , تری شان جل جلالہ

تری قدرتوں کا شمار کیا , تری عظمتوں کا حساب کیا

تو خدا ہے میرے حبیب کا , تری شان جل جلالہ

یہ کرم ہے تیرا مرے خدا ، جو میں کہہ رہا ہوں یہ برملا

میں ترا ہوں اور ہے تو مرا ، تری شان جل جلا لہ

مرے سینے میں تیری روشنی , مرے چار سو تیرا نور ہے

مجھے ظلمتوں سے بچا لیا , تری شان جل جلا لہ

مری جستجو کو کمال دے , مری آرزو کو نہال کر

رہوں بن کے تیرا ہی میں سدا , تری شان جل جلا لہ

تری یاد میں ہی حیات ہو , ترے ذکر پر ہی ممات ہو

یہ قبول کر میری التجا , تری شان جل جلالہ

مرے آنسوؑوں کو صدا ملے , مری سسکیوں کا بھرم رہے

رہے لب پہ ہر دم تری ثنا , تری شان جل جلالہ

تو ہی عرش پر تو ہی فرش پر , تو ہی شاہ رگ سے قریب تر

ترے جلوے پھیلے ہیں جا بجا , تری شان جل جلالہ

مری زندگی کا سرور تو , مری بندگی کا ہے نور تو

مرے ہر عمل کے اے آشنا , تری شان جل جلالہ

پڑی مشکلیں میرے سر پہ جب ، مجھے گھیرا درد و الم نے جب

ترے ذکر نے دیا حوصلہ , تری شان جل جلالہ

کبھی لڑکھڑایا نہیں ہوں میں , کبھی بے قرار ہوا نہیں

ملا ہر گھڑی ترا آسرا , تری شان جل جلالہ