اُن کی چوکھٹ کو سدا پیشِ نظر رکھا ہے ۔ سید وحید القادری عارف

شاعر: وحید القادری عارف

نعت ِ رسول ِ کریم صلی اللہ علیہ وآلہ وسلم

اُن کی چوکھٹ کو سدا پیشِ نظر رکھا ہے

دل جھکایا ہے جہاں پر وہیں سر رکھا ہے

قلبِ مضطر کا سکوں دیدہء بے چین کا چین

درِ آقا کے سوا اور کدھر رکھا ہے

میری قسمت ہے کہ مولا نے مری قسمت میں

بارہا شہرِ مدینہ کا سفر رکھا ہے

شرطِ بخشش درِ سرکار پہ جانا ٹہرا

یہیں خالق نے دعاؤں میں اثر رکھا ہے

میرے آقا ہیں مری پشت پناہی کے لئے

ہوں غلام اُن کا تو کس بات کا ڈر رکھا ہے

اور کیا مانگیں کہ سرکار کی نسبت دے کر

رب نے ہر کاسہء امید کو بھر رکھا ہے

مدحِ سرکارِ میں پائی وہ حلاوت ہم نے

دل کو خوگر اِسی اک ذکر کا کر رکھا ہے

وردِ لب نامِ نبی شام و سحر ہو کہ اسے

حق نے خود باعثِ ہر فتح و ظفر رکھا ہے

نعت سرکار کی کہتا ہے کرم سے اُن کے

ورنہ عارف کہاں کیا اُس میں ہُنر رکھا ہے

مزید دیکھیے

پچھلا کلام | اگلا کلام | وحید القادری عارف کی حمدیہ و نعتیہ شاعری | وحید القادری عارف کا مرکزی صفحہ