عالم کی ابتدا بھی ہے تو ، انتہا بھی تو ۔ احمد ندیم قاسمی

شاعر: احمد ندیم قاسمی

نعتِ رسولِ آخر صلی اللہ علیہ وآلہ وسلم

عالم کی ابتدا بھی ہے تو ، انتہا بھی تو

سب کچھ ہے تو ، مگر ہے کچھ اس کے سوا بھی تو

کندہ درِ ازل پہ ترا اسمِ پاک تھا

قصرِ ابَد میں گونجنے والی صدا بھی تو

فردا و حال و ماضئ انساں یہی تو ہے

تو ہی تو ہو گا ، تو ہی تو ہے اور تھا بھی تو

یوں تو مرے ضمیر کا مسند نشیں بھی ہے

لیکن ہے شش جہات میں جلوہ نما بھی تو

تو میرِ کارواں بھی ہے ، سَمتِ سفر بھی ہے

میرا امام بھی ، مرا قبلہ نما بھی تو

بے اجْر تیرے در سے نہ پلٹے گی میری نعت

اک اور نعت کا مجھے دے گا صلہ بھی تو