جلاتے رہئیے سدا مدحت نبی کا چراغ

شاعر :عالم نظامی

نعتِ رسولِ آخر صلی اللہ علیہ وآلہ وسلم

جلاتے رہئے سدا مدحت نبی کا چراغ

نہ جانے کب کہاں بجھ جائے زندگی کا چراغ

اندھیرے قبر کے پل بھر میں ہو گئے رخصت

میں لیکے اترا جو عشق محمدی کا چراغ

فضائے دل ہے معطر تمہاری یادوں سے

تمہارے ذکر سے روشن ہے زندگی کا چراغ

ثنا حضور کی ہوتی نہیں بغیر اس کے

دیار دل میں جلا پہلے عاشقی کا چراغ

تمہاری ذات نے ہم کو وفا کا درس دیا

جلایا آپ نے ہر سمت آگہی کا چراغ

کرم یہ ان کی نگاہ کرم کا ہے عالم

ہوا کے سامنے جلتا نہیں کسی کا چراغ