کلام احمد مرسل سمندر ہے لطافت کا ۔ کامل جونا گڑھی

شاعر: کامل جونا گڑھی

نعتِ رسولِ آخر صلی اللہ علیہ وآلہ وسلم

کلامِ احمدِ مرسل سمندر ہے لطافت کا

نزاکت کا، نفاست کا فصاحت کا بلاغت کا

شہِ کونین کا دل عہدِ طفلی ہی سے تھا مخزن

ریاضت کا، عبادت کا، محبت کا، قناعت کا

خدا نے سب سے پہلے کر رکھا تھا خاتمہ شہﷺ پر

نبوت کا، رسالت کا، ہدایت کا، شفاعت کا

نبی اُمّی نے سکھلایا سبھوں کو قاعدہ آکر

اطاعت کا، امارات کا، ریاست کا، سیاست کا

سنایا غازیانِ صف شکن کو شاہ نے مژدہ

قیادت کا، بشاشت کا، سعادت کا، شہادت کا

بڑھے پھر کیوں نہ دینِ مصطفٰے ہے وعدہ خالق

حفاظت کا، حمایت کا، اعانت کا، اشاعت کا

خدا نے ذاتِ احمد کو کیا کاملِ عجب دریا

شرافت کا، صداقت کا، سخاوت کا، شجاعت کا