جدھر بھی دیکھیے خیرالوریٰ کا چرچا ہے

زمیں سے تا بہ فلک مصطفیٰ کا چرچا ہے

انھیں کے نور کی رخشندگی ہے عالم میں

ہر اک طرف مرے نورِ خدا کا چرچا ہے

سخاوتوں کی حسیں کائنات میں ہردم

تمام خلق کے حاجت روا کا چرچا ہے

یتیموں بے کسوں بیواؤں کی زبانوں پر

کرم شعار کرم آشنا کا چرچا ہے

براے بخشش و غفراں لبوں پہ عاصی کے

شفیعِ روزِ جزا حق نما کا چرچا ہے

سبھی رسل نے کہا اذھبوا الیٰ غیری

زبانِ فیض پہ اِنّی لھا کا چرچا ہے

کرے گا دور مری قبر کی جو تاریکی

خیال و فکر پہ اس نقشِ پا کا چرچا ہے

ورق ورق سے عیاں ہے تجلیِ سیرت

کلامِ رب میں شہِ انبیا کا چرچا ہے

ہے نورِ نعت سے روشن دلِ مشاہدؔ بھی

جہانِ فکر میں ان کی ثنا کا چرچا ہے

۲۳؍ رمضان المبارک 1443ھ /25 ؍اپریل 2022ء بروز پیر

٭٭٭

پچھلا کلام