وجہ فروغ چہرہ خوباں تمہی تو ہو ۔ نذر صابری

شاعر: نذر صابری

نعتِ رسولِ آخر صلی اللہ علیہ وآلہ وسلم

وجہ فروغِ چہرہ خوباں تمہی تو ہو

آپ وہوائے فصل بہاراں تمہی تو ہو

تازہ ہے جس سے روئے نگاراں تمہی تو ہو

پُرخم ہے جس سے زلفِ عروساں تمہی تو ہو

صحرا ہیں جس سے رشکِ گلستان تمہی تو ہو

ذرّے ہیں جس سے خلد بداماں تمہی تو ہو

روشن سبھی چراغ تمہارے چراغ سے

کہتے ہیں جس کو بوذر وسلماں تمہی تو ہو

تسکیں سے آشنا ہے جہاں ذوقِ انتخاب

وہ خسروِ ولایتِ خوباں تمہی تو ہو

آزادہ خزاں ہے جہاں نخلِ زندگی

اے جانِ آرزو وہ گلستان تمہی تو ہو

جس کی جھلک سے وادیِ ایمن بھڑک اٹھی

اس نورِ برق پاش کے طوفاں تمہی توہو

جلووں سے جس کے زندگی گرمِ سفر ہوئی

اس صبح نور بہار کے ساماں تمہی تو ہو

کیوں کر تمہاری بات نہ ہو حرفِ آخریں

مضمونِ کائنات کے عنواں تمہی تو ہو