دل کو آئینہ بنایا گیا جن کی خاطر ۔ اعظم چشتی
نعت کائنات سے
This is the approved revision of this page, as well as being the most recent.
نعت ِ رسول ِ کریم صلی اللہ علیہ وآلہ سلم
دل کو آیئنہ بنایا گیا جن کی خاطر
آنکھ کو ہوش میں لایا گیا جن کی خاطر
نغمہ بلبل کو سیکھایا گیا جن کی خاطر
گل میں خوشبو کو بسایا گیا جن کی خاطر
جن کی خاطر ہوئی تخلیق بہار ابدی
باغ توحید سجایا گیا جن کی خاطر
شاخ کو، غنچے کو، بلبل کو چمن کو گل کو
عالم وجد میں لایا گیا جن کی خاطر
عرش کو مہر کو انجم کو فلک کو مہ کو
ہمہ تن چشم بنایا گیا جن کی خاطر
وہ جمال ازلی جلوہ ذات احدی
سارے نبیوں سے چھپایا گیا جن کی خاطر
