تیرے دم سے ہے حدیث جاں رسول مہرباں ۔ ظہور احمد فاتح

شاعر: ظہور احمد فاتح

نعتِ رسولِ آخر صلی اللہ علیہ وآلہ وسلم

تیرے دم سے ہے حدیثِ جاں رسولِ مہرباں

دفترِ ہستی کا تو عنواں رسولِ مہرباں

میں، مرے بچے، مرے ماں باپ ہوں تجھ پر فدا

تجھ پہ ہوں قربان قلب وجاں رسول مہرباں

عجز پر تیرے زمیں کی خاکساری ہو نثار

تیری رفعت پر فلک حیراں رسولِ مہرباں

لائق صد رشک تیری بندگی، تیرا خلوص

رب عبادت پر تری نازاں رسولِ مہرباں

تیرے استقلال میں تھا دینِ عالی کا فروغ

تیری عظمت نازش انساں رسولِ مہرباں

تیرے فرقِ ناز پر ختمِ نبوت کا ہے تاج

تو خدا کا بندۂ ذیشاں رسولِ مہرباں

میرا فاتح، میرا شاہد، میرا حاشر بھی ہے تو

میرے پیغمبر، مرے جاناں رسولِ مہرباں