ہماری زندگی عشق شہ ابرار تک پہنچی
نعت کائنات سے
شاعر: فاروق رضا
بشکریہ:عالم نظامی
نعتِ رسولِ آخر صلی اللہ علیہ وآلہ وسلم
ہماری زندگی عشق شہ ابرار تک پہنچی
نکل کر ظلمتوں سے بارش انوار تک پہنچی
محبت سے، عقیدت سے، لیا جب نام آقا کا
مری آواز طیبہ کے در و دیوار تک پہنچی
مجھے سب کچھ ملا شاہ مدینہ کے وسیلے سے
دعا جو میں نے کی، تاثیر کے معیار تک پہنچی
رسول پاک سے اس نے شفاعت کی سند پائی
محبت جس کو لےکر آپ کے دربار تک پہنچی
مرے کنبے کے ہراک فرد نے ایمان پایا ہے
خدا کا شکر یہ نعمت مرے گھر بار تک پہنچی
خداوندا! گنہگاروں میں شامل ہے رضا لیکن
مرے ایمان کی نسبت شہ ابرار تک پہنچی
