قمرآسی

زمانے کے بدن پر تازگی ہے

نسیمِ صبحِ طیبہ چل رہی ہے

دہن مہکا ثنائے مصطفیٰ سے

عجب تاثیر اس کی شبنمی ہے

وگرنہ دشت کب ہوتے ہیں گلزار

خدا کے نور کی جلوہ گری ہے

ہماری مانگ ہی ہوتی ہے محدود

خزانوں میں کہاں ان کے کمی ہے

معطر ہو گیا میرا تخیل

کلی مدحِ نبی کی کھل گئی ہے

بجز معبودِ واحد اور کس کو

مقامِ مصطفیٰ سے آگہی ہے

نواحِ گنبدِ خضرا کی لذت

نہیں ہے گفتنی ، نا گفتنی ہے

وہ چونکہ رحمت اللعالمیں ہیں

خوشی آمد کی ان کی عالمی ہے

گئے معراج کی خاطر جو پل پھر

زمیں کی جان پر آقا بنی ہے

نجومِ شاہ دیں ہیں سب صحابہ

صراطِ خلد ان کی پیروی ہے

رواں ہے خامۂَ مدحِ محمد

یہ نعتِ سرورِ دیں کی صدی ہے

فسردہ ہے قمرؔ ہجرِ نبی میں

خدا کا شکر ان کا امتی ہے قمرآسیؔ