کوئی ردیف میں ہے کوئی قافیہ میں ہے

شاعر: لکشمن شرما واحد

بشکریہ:عالم نظامی

نعتِ رسولِ آخر صلی اللہ علیہ وآلہ وسلم

کوئی ردیف میں ہے کوئی قافیہ میں ہے

ہر لفظ میرا وصف رسول خدا میں ہے

باغ بہشت میں بھی نہ مل پائیگا کبھی

جتنا سکون دامن خیر الوریٰ میں ہے

کیا کیا بیاں ہو شان رسالت مآب میں

ہر وصف ہر کمال حبیب خدا میں ہے

مصروف ذکر ہم ہی نہیں ہیں جہان میں

نام نبی کا ذکر سبھی انبیا میں ہے

قرآن کی ہیں آیتیں اس بات کی گواہ

رب کی رضا بھی میرے نبی کی رضا میں ہے

واحد میں چاہ کر بھی نہ کر پاؤنگا بیان

اک معجزہ حضور کی ہر اک ادا میں ہے