یا رب خلوص شوق کو اتنی رسائی دے ۔ طفیل ہوشیارپوری

شاعر: طفیل ہوشیارپوری

نعتِ رسولِ آخر صلی اللہ علیہ وآلہ وسلم

یا رب خلوصِ شوق کو اتنی رسائی دے

دل کے حرم میں شہرِ مدینہ دکھائی دے

تنگ آ گئی ہے قیدِ عناصر سے زندگی

زنجیر صبح وشام سے مجھ کو رہائی دے

ہر بات میں ہوں نامِ محمدﷺ کی تابش

ہر سانس میں پیامِ محمدﷺ سنائی دے

مولائے کائنات کی چشمِ کرم تو ہے

جو بیکسوں کو طاقتِ خیبر کشائی دے

صرف ایک لمحہ روضۂ اقدس کو چوم لوں

صرف ایک لمحہ کی مرے موَلا خدائی دے

ہو دل کی سلطنت میں نہ سرکش کوئی اُمنگ

درویش کو بھی ہمت فرما نروائی دے

یا مجھ کو مرحمت ہو محبت حضور کی

یا میرے دل کو طاقتِ صبر آز مائی دے

اس کربلا میں صدقہ شبیرؓ کے طفیل

میرے دلِ حزیں کو بھی کرب آشنائی دے