گریہ مرا وضو ہے حضوری نماز ہے ۔ شاہد ماکلی

شاعر : شاہد ماکلی

نعتِ رسولِ آخر صلی اللہ علیہ وآلہ وسلم

گریہ مرا وُضو ہے ، حضوری نماز ہے

اب میں ہوں اور تصورِ شہر ِ حجاز ہے

باطن میں لو ہے ایک سراج ِ منیر کی

پتھر سا دل اِسی کی تپش سے گداز ہے

بگڑے ہوئے اُمور سنور جائیں گے مرے

اک دستِ مہربان مرا کارساز ہے

وابستگی حریصُ علیکم سے ہے مری

باطن میں اور طرح کا اک حرص و آز ہے

اللہ مجھ کو عشق میں ثابت قدم رکھے

اس راہ میں ہزار نشیب و فراز ہے