میرے بیٹے کر یقیں سب سے بڑا اللہ ہے ۔بیکلؔ اتساہی

اپنے ادارے کی نعتیہ سرگرمیاں، کتابوں کا تعارف اور دیگر خبریں بھیجنے کے لیے رابطہ کیجئے۔

میرے بیٹے کر یقیں سب سے بڑا اللہ ہے

وہ ہر اک نیکی بدی سے ہر طرح آگاہ ہے

وہ زمانے میں غرور و تمکنت کو توڑ دے

ایک پل میں چاہے تو ٹوٹے دلوں کو جوڑ دے

جو اکڑ کر چلتے ہیں ان کو جھکا دیتا ہے وہ

ناز جن کو دھن پہ ہے وہ دھن مٹا دیتا ہے وہ

قادرِ مطلق ہے وہ ، سب پر اسی کا راج ہے

بادشاہوں کا اسی کے ہاتھ تخت و تاج ہے

وہ ہمالہ کو کرے گہرا سمندر آن میں

پھول کی وادی اگا دے گرم ریگستان میں

ہے وہی سب کچھ وہی خالق وہی مناّن ہے

دوزخی کو جنتی کر دے بڑا رحمان ہے

جو چھٹے پھرتے ہیں ان کو قید میں دیتا ہے ڈال

جو اسیری میں پڑے ہیں ان کو لیتا ہے نکال

اس کے ہاتھوں میں ہر اک انسان کی تقدیر ہے

وہ ہے منصف یہ جہاں فریاد کی زنجیر ہے

وہ زمیں کے ذرے ذرے کو کرتا ہے پل میں مہر و ماہ

راج کرواتا ہے منگتے کو بنا کر بادشاہ

عظمت و اعزاز سب کچھ اس سے ہی منسوب ہے

بعد اس کے سب کا مالک اس کا ہی محبوب ہے

بعد رب العالمیں ہے رحمت للعالمیں

جس کی رحمت سے ہے یہ فرشِ زمیں عرشِ بریں

جب کرم فرماتے ہیں جس پر رسولِ کائنات ﷺ

تب بفضلِ ربی بن جاتی ہے اس کی بگڑی بات

مانگ لے حسنین کا صدقہ رسول اللہ ﷺ سے

تجھ کو سب مل جائیگا بیکل ؔاسی درگاہ سے

بیکلؔ اتساہی(یوپی)

نئے صفحات
سرور حسین نقشبندی تقدیس قلم مناقب حضرت عثمان غنی کلیات صبیح رحمانی عبد الغنی تائب زبیب مسعود ڈاکٹر جوہر قدوسی سلیم شہزاد کی تقدیسی شاعری "کشفیہ" پر تبصرہ