متاع
متاع ، اویس راجا کا پہلا نعتیہ مجموعہ ہے جو مارچ 2022 میں ادارہ اوج پبلیکیشنز، ملتان نے شائع کیا ۔ اس مجموعے 190 صفحات پر مشتمل ہے ۔ اس پر لکھنے والوں میں ڈاکٹر ریاض مجید، ڈاکٹر خورشید رضوی ، مجید اختر اور رفیع الدین راز شامل ہیں ۔ اندرونی فلیپس پر شاعر کے عمدہ اشعار دیے گئے ہیں جبکہ بیک سائیڈ پر ڈاکٹر طاہر القادری کی رائے موجود ہے ۔ اس مجموعے میں ایک حمد اور اڑسٹھ نعتیں شامل ہیں اور تمام نعتیں غزل کی ہئیت میں ہیں ۔
متاع پر رائے دیتے ہوئے ابو الحسن خاور لکھتے ہیں۔
آج کی شاعری (غزل) قرینے سے کہے ہوئے تیز، سریع الاثر مصرعوں اور چونکا دینے خیال پر کھڑی ہے ۔ اگرچہ ہر اچھے شعر میں صرف یہی خوبیاں نہیں ہوتیں لیکن جہاں یہ گوہر مقصود حاصل ہو جائے ۔ لطف دوبالا ہو جاتا ہے ۔ اویس راجا کی نعتیہ شاعری کا اسلوب بھی اسی بنیاد پر استوار ہو رہا ہے ۔ "متاع" ان کا پہلا مجموعہ ہے جس میں کچھ طرحی و ردیفی مشق ِ سخن والی نعتیں بھی شامل ہیں لیکن جہاں وہ ان بندشوں سے آزاد ہوئے بڑے جاذب قرینے وجود میں آئے ۔
