دنیا کو سیدھی راہ دکھانا رسول کا ۔ رضوی امروہوی

شاعر: رضوی امروہوی

نعتِ رسولِ آخر صلی اللہ علیہ وآلہ وسلم

دنیا کو سیدھی راہ دکھانا رسول کا

رحمت ہے کائنات میں آنا رسول کا

روزِ ازل سے تا بہ ابد کائنات میں

ہر دور ہے نبی کا زمانا رسول کا

احسان ہے یہ نوعِ بشر پر حقیقتاً

تشریف کائنات میں لانا رسول کا

دینا دعائیں اُمتِ عاصی کو ہر قدم

اُمت کا ہر قدم پہ ستانا رسول کا

مانا ہے جس نے دونوں جہاں میں ہے کامیاب

بدبخت جس نے حکم نہ مانا رسول کا

احسان کائنات کے ہر فرد پر ہے یہ

بندوں کو کبریا سے ملانا رسول کا

یہ ماننا پڑے گا مقدّر کی بات ہے

رضوی کو نعت گو بنانا رسول کا