دشمنِ احمد پہ شدت کیجیے۔ امام احمد رضا خان بریلوی
شاعر : امام احمد رضا خان بریلوی
کتاب : حدائق بخشش
نعتِ رسولِ کریم صلی اللہ علیہ وآلہ وسلم
دشمنِ احمد پہ شِدَّت کیجئے
مُلحِدَوں کی کیا مُرُوّت کیجئے
ذِکر اُن کا چھیڑیے ہر بات میں
چھیڑنا شیطاں کا عادت کیجئے
مثلِ فارس زلزلے ہوں نجد میں
ذکرِ آیاتِ وِلاَدَت کیجئے
غَیظ میں جل جائیں بے دِینَوں کے دِل
’’ یَا رَسُوْلَ اللہ ‘‘ کی کَثرَت کیجئے
کیجئے چَرچا اُنھیں کا صُبح و شام
جانِ کافر پر قِیَامَت کیجئے
آپ درگاہِ خُدا میں ہیں وجیہہ
ہاں شفاعت بالوجاہت کیجئے
حق تمھیں فرما چکا اپنا حبیب
اب شَفاعَت بِالمُحَبَّت کیجئے
اِذن کب کا مل چکا اب تو حضور
ہم غریبوں کی شفاعت کیجئے
ملحدوں کا شک نکل جائے حضور
جانبِ مہ پھر اشارت کیجئے
شِرک ٹھہرے جس میں تعظیمِ حَبِیب
اُس بُرے مَذہَب پہ لَعنَت کیجئے
ظالمو! محبوب کا حق تھا یہی
عشق کے بدلے عداوت کیجئے
وَالضُّحٰی، حُجْرَاتْ، اَلَمْ نَشْرَحْ سے پھر
مومنو! اتمامِ حجّت کیجئے
بیٹھتے اٹھتے حضورِ پاک سے
اِلتِجَا و اِستِعَانْت کیجئے
یا رسول اللہ دُہائی آپ کی
گوشمالِ اہلِ بدعت کیجئے
غوثِ اعظم آپ سے فریاد ہے
زندہ پھر یہ پاک ملّت کیجئے
یا خدا تجھ تک ہے سب کا مُنتہیٰ
اولیا کو حکمِ نصرت کیجئے
میرے آقا حضرتِ اچھے میاں!
ہو رضؔا اچھا وہ صورت کیجئے
مزید دیکھیے
حرزِ جاں ذکرِ شفاعت کیجیے | دشمنِ احمد پہ شدت کیجیے | شکرِ خدا کہ آج گھڑی اس سفر کی ہے
