حفیظ جالندھری

حفیظ جالندھری اردو کے بہت اہم شاعر ہیں ۔ پاکستان کا قومی ترانہ اور " شاہنامہ اسلام ان کے دو بہت بڑے حوالے ہیں ۔

حفیظ جالندھری کے بارے اظہر جاوید لکھتے ہیں

"جو کام حفیظ جالندھری نے شاعری سے لیا ہے وہ منفرد، یکتا اور سب سے بالا ہے ۔ ۔ وہ شاعر تو بے مثل ہے ہی ۔ حیرت اور مسرت کی بات ہے کہ ان کا اسلامی تاریخ کا مطالعہ بہت گہرا ہے اور انہوں نے اسے جس طرح ہضم کرکے شعروں میں پرویا ہے ۔ اس کی کوئی دوسری مثال نہیں ۔ ۔ نہایت سادہ بیان لیکن بے پروقار اور معیاری ۔ حفیظ کو جس طرح اردو کے علاوہ عربی، فارسی اور ہندی پر عبور اور ان کے استعمال کا ادراک ہے ۔ یہ ہمارے اردو زبان کے اور خصوصا حفیظ کے ہم عصروں میں سے بہت کم ہی کو نصیب ہوا ہے ۔ علامہ اقبال کو اس فہرست میں شامل نہ کریں ان کا منصب اور مرتبہ الگ ہے "

نمونہ کلام

زباں پر اے خوشا صل علی یہ کس کا نام آیا

زباں پر اے خوشا صل علی یہ کس کا نام آیا

کہ میرے نام جبریل امیں لے کر سلام آیا

محمدﷺ جان عالم ، فخر عالم، ھادی اکرم

امام الانبیاء خیر البشر پیغمبر اعظم

محمدﷺ وہ جمال اولیں وہ پیکر نوری

محمدﷺ کاشف سر ظہور و رمز مستوری

محمدﷺ صاحب خلق عظیم و ناشر حکمت

محمدﷺ مصدر فیض عمیم و شافع امت

بہ صورت نور سبحانی بہ معنی ظل رحمانی

نشان حجت حق مظہر تائید ربانی

وہ جس کو فاتح ابواب اسرار قدم لکھئے

بنائے عرش و کرسی باعث لوح و قلم لکھئے

علی الاعلان سر کنت کنزا مخفیا کہیئے

مگر اس کی شریعت کا ادب مائع ہے کیا کہیئے