بیاں کو نعمت خضری سے بھر دیا جائے ۔ حسنین اکبر

شاعر : حسنین اکبر

نعتِ رسولِ آخر صلی اللہ علیہ وآلہ وسلم

بیاں کو نعمتِ خضریٰ سے بھر دیا جائے

جو لکھ رہا ہوں اسے نعت کر دیا جائے

میں ایک سنگ ہوں اور بولنے کی حسرت ہے

مجھے بھی اُن ص کی ہتھیلی پہ دھر دیا جائے

سنا ہے آپ ص مصیبت کے وقت آتے ہیں

تو مشکلوں کو مری سمت کر دیا جائے

اِسی کا نام کریمی ہے مصطفیٰ ص کی قسم

کہ کوئی مانگے نہ مانگے مگر دیا جائے

مدینہ مجھ سے زیارت کی نذر مانگے اگر

تو میرا فیصلہ ہو گا کہ سر دیا جائے

رکھے وہ ہستی ءِ بے سایہ زیرِ سایہ مجھے

اِس ایک شرط پہ جنت میں گھر دیا جائے

خدا کے خوف سے پہلے نبی کا خوف رہے

گناہ گار کو رحمت کا ڈر دیا جائے

میں آزماؤں محمد ص کے اسمِ اعظم کو

مجھے سفینہ نہیں بس بھنور دیا جائے

کچھ اشک بھی ہیں جنہیں معجزوں کی حسرت ہے

فقط دعاؤں کو کیوں کر اثر دیا جائے

دل و دماغ کا یہ خطہءِ عرب ہے اجاڑ

نبی ص کے نور سے لطفِ سحر دیا جائے

سحر کو شمس تو شب کو قمر دیا جائے

یہ رات دن کا سفر ختم کر دیا جائے

لغت میں صدقہءٍ خیر البشر ص رہے موجود

میں چاہتا ہوں سخن معتبر دیا جائے

یہ شہرِ علم کی خواہش تھی کوئی مجھ میں رہے

تو کبریا سے کہا مجھ کو در دیا جائے

ہوں دو جہان پہ رحمت کی بارشیں اکبر

مجھے بھی بوند برابر وہ زر دیا جائے

مزید دیکھیے

زیادہ پڑھے جانے والے کلام
اے سبز گنبد والے منظور دعا کرنا ۔ صابر صابری تو شاہ خوباں، تو جان جاناں، ہے چہرہ ام الکتاب تیرا ۔ صائم چشتی لم یات نظیرک فی نظر مثل تو نہ شد پیدا جانا ۔ احمد رضا بریلوی نہ کہیں سے دور ہیں منزلیں ۔ منور بدایونی طائف میں کربلا کے سفینے کی روشنی ۔ نجمہ شاہین کھوسہ نسیما ! جانب بطحا گزر کن . مولانا عبدالرحمن جامی	مصطفٰے جانِ رحمت پہ لاکھوں سلام۔ امام احمد رضا خان بریلوی حضور ایسا کوئی انتظام ہو جائے ۔ سید صبیح الدین صبیح رحمانی حدود طائر سدرہ حضور جانتے ہیں ۔ سرور حسین نقشبندی اس کرم کا کروں شکر کیسے ادا ۔ عبدالستار نیازی یا نبی نظر کرم فرمانا اے حسنین کے نانا ۔ اوصاف علی زمین و زماں تمہارے لیے۔ امام احمد رضا خان بریلوی