احمد ندیم قاسمی

اس کا بندہ ہوں جو بندے کو خدا دیتا ہے

جب اترتی ہے مری روح میں عظمت اس کی

مجھ کو مسجود ملائک کا بنا دیتا ہے

رہنمائی کے یہ تیور ہیں کہ مجھ میں بس کر

وہ مجھے میرے ہی جوہر کا پتا دیتا ہے

اس کے ارشاد سے مجھ پہ مرے اسرار کھلے

کہ وہ ہر لفظ میں آئینہ دکھا دیتا ہے

ظلمت دہر میں جب بھی میں پکاروں اس کو

وہ مرے قلب کی قندیل جلا دیتا ہے

وہی نمٹے گا مری فکر کے سناٹوں سے

بت کدوں کو جو اذانوں سے بسا دیتا ہے

وہی سر سبز کرے گا مرے ویرانوں کو

آندھیوں کو بھی جو کردار صبا دیتا ہے

قصر والوں سے گزر جاتا ہے چپ چاپ ندیم

در محمدﷺ کا جب آئے تو صدا دیتا ہے

فہرست