گو ہوں یکے از نغمہ سرایانِ محمد ۔ عبد العزیز خالد

شاعر: عبد العزیز خالد

نعتِ رسولِ آخر صلی اللہ علیہ وآلہ وسلم

گو ہوں یکے از نغمہ سرایانِ محمد ﷺ

شاید کہ مری لے نہیں شایانِ محمد ﷺ

ہے پاسِ ادب شرطِ نُخُستینِ مَحبّت

بد مست نہ ہوں زمزمہ سنجانِ محمد ﷺ

جو بھی ہے تجلی کہیں پھوٹی ہے یہیں سے

ہے مطلعِ ہر مہر، گریبانِ محمد ﷺ

ظلمت کدہِ دہر میں لو دیتی رہے گی

تا صبحِ ابد شمعِ فروزانِ محمد ﷺ

سورج کی طرح یہ بھی دلیل آپ ہے اپنی

محتاجِ نظائر نہیں برہانِ محمد ﷺ

دیں اس کی صداقت کی تو منکر بھی گواہی

ہے مثلِ حرم حرمتِ پیمانِ محمد ﷺ

آئینہِ اسکندر و پیمانہِ جمشید

ہر سنگ رہے آبلہ پایانِ محمد ﷺ

جانے کہ نہ جانے کوئی مانے کہ نہ مانے

ہر دور ہے بہرہ ورِ فیضانِ محمد ﷺ

اقرار سے ممکن ہے کہ مانع ہو تعصب

ہر قوم پہ ہے بیش و کم احسانِ محمد ﷺ

ظاہر بھی نہاں بھی صفتِ لفظ و معانی

ادراکِ بشر سے ورا شانِ محمد ﷺ

خاکی بھی ہے نوری بھی پیمبر بھی بشر بھی

ہے بھی کہیں یارب حدِ امکانِ محمد ﷺ

تا حشر در و دشت کو مہکاتی رہے گی

خوشبوئے گلِ سنبل و ریحانِ محمد ﷺ

مستقبلِ تہذیب ہے مخدوش، نہ جب تک

دستورِ زمانہ بنے قرآنِ محمد ﷺ

ہم فرد ہیں جس ملتِ بیضا کے اسے بھی

حاصل نہیں حاصل نہیں عرفانِ محمد ﷺ

تاویلِ احادیث کا آتا ہو جسے علم

ایسا نہ ملا کوئی زباں دانِ محمد ﷺ

دل خوب سمجھتا ہے مَحبت کے تقاضے

ہر کسبِ کمال اس کا ہے قربانِ محمد ﷺ

کیا جانیے کس بات پہ دنیا کو گماں ہے

خالؔد بھی ہے منجملہِ خاصانِ محمد ﷺ

مجموعہِ نعت: مَاذ مَاذ

پیشکش

ابو المیزاب اویس

مزید دیکھیے

نعت خوانی کے معروف کلام
اے سبز گنبد والے منظور دعا کرنا ۔ صابر صابری حدود طائر سدرہ حضور جانتے ہیں ۔ سرور حسین نقشبندی اس کرم کا کروں شکر کیسے ادا ۔ عبدالستار نیازی نہ کہیں سے دور ہیں منزلیں ۔ منور بدایونی حضور ایسا کوئی انتظام ہو جائے ۔ سید صبیح الدین صبیح رحمانی لو مدینے کی تجلی سے لگائے ہوئے ہیں ۔ نصیر الدین نصیر گیلانی	روک لیتی ہے آپ کی نسبت تیر جتنے بھی ہم پہ چلتے ہیں ۔ خالد محمود نقشبندی حال دل کس کو سنائیں آپ کے ہوتے ہوئے ۔ الطاف کاظمی تو شاہ خوباں، تو جان جاناں، ہے چہرہ ام الکتاب تیرا ۔ صائم چشتی لم یات نظیرک فی نظر مثل تو نہ شد پیدا جانا کھلا ہے سبھی کے لیے باب رحمت وہاں کوئی رتبے میں ادنیٰ نہ عالی ۔ اقبال عظیم میری الفت مدینے یوں ہی نہیں ۔ منیر قصوری

نعت کائنات پر نئی شخصیات
سرور بارہ بنکوی، بارہ بنکی حسن فتح پوری ،فتح پور قمر صدیقی، بھارت مناظر حسن اشرف ، عمر علی شاہ ، لودھراں شکیل اعظمی، الطاف ضیاء، مالیگاؤں عالم نظامی ،ممبئی زبیر گورکھپوری، ممبئی انجم بارہ بنکوی ، بھارت صفدر علی محسن، نقیب مختار تلہری، بریلی رشید وارثی، کراچی